Cardamine hirsuta

Anual, a miúdo con varios talos de pequeno tamaño (ata 30 cm.), rectos e glabros ou case glabros. As follas basais, de 3-10 cm., dispostas en mouta, levan 1-5 pares de folíolos peciolulados obovados ou orbiculares, e outro terminal máis ancho. As caulinas, en número de 2-6 por talo, de 1-8 cm., levan 2-5 pares de folíolos sésiles lineares a ovais, e outro terminal reniforme.

As flores aparecen dispostas en acios con flores sobrepasadas ás claras polos froitos inferiores. Sépalos de 1,5-2 mm. e pétalos brancos de 2,5-5 mm. Silicuas de 18-25 x 1 mm., paralelos ao raquis e sobre pedicelos de 3-8 mm.

Florece entre febreiro-maio, en bases de muros, preto de regatos, rochedos ou mesmo arvense. Abondosa en toda Galiza.

Lugar de observación: Sobreirais do Arnego. Carmoega. Agolada.