Allium guttatum

Bulbo ovoide ou esférico de 1-2,5 cm., con túnica algo coriácea que se desfai na parte superior. Escapo de ata 80 cm., con 2-4 follas envaiñadoras ata 3/4 lineares, fistulosas, cilíndricas, de 10-20 cm. x 1-3 mm. Inflorescencia mesta, ovoidea, de 2-5 cm., con espata caduca de 1 valva de ata 5 cm.

Pedicelos de 5-35, desiguais, sen bractéolas entre eles. Flores con tépalos rosados de 3-4,5 x 0,5-1,5 mm., con mancha dorsal verde ou púrpura. Estames exertos, simples os externos e tridentados os internos, co dente central -que leva antera- máis curto. Ovario ovideo, con estilete de 2 mm. Cápsula globosa de 2-4 mm.

Florece entre xuño e agosto. En Galiza aparece en beiras de estradas e breixos secos sobre substratos serpentínicos e ultrabásicos do centro do país, así como áreas mediterráneas.

Lugar de observación: Brocos. Agolada.